香港KOL你遊新潟（馬高斯TV篇）新潟旅程品嚐過的美食10選
1. 中華飯店 聖龍
打頭陣第1間就係「中華飯店 聖龍」，日本的炒飯同餃子比起香港真係好食好多，結果我太想食就決定去呢間！順帶一提店舖附近就有一間animate，睇完玩具開始肚餓就去食餃子！
店舖附近係一個大型停車場，就近的街道都有唔少餐廳，我去到的時候都要排一陣隊。呢度的裝潢就非常之有懷舊感，真係好似返咗老家樓下間餐廳的感覺，不時會聽到老細炒飯的聲音！而餐廳設有多個配搭的套餐我就揀咗拉麵配炒飯的A set再追加咗一份餃子加埋先1240日圓。
首先有一個長通粉沙律做前菜，然後係甜品的冰凍菠蘿片；接著就係炒飯，我想講同店外的食物模型好唔同，真正的炒飯份量多好多www而且日本的炒飯真係做到一粒粒，仲要夠鑊氣夠惹味；跟住就係拉麵，又係比預期中再大碗一啲，真係夠曬抵食！佢的湯味道就比較清甜，亦有唔少油脂夠晒香，麵條就係用上粗麵條，掛湯一流！叉燒方面就只得一塊，但係再多都未必食得晒。
跟住就係期待而久的餃子，呢度就係唯一的扣分位，大家都睇到係煎到外皮黑晒佢入面的餡料係夠香口多汁，但外面黑晒就會有苦味，亦唔會食黑咗的部份！整體嚟講好適合大食的我，簡直係炭水化合物的恐怖襲擊，女仔的話碗拉麵都可能食唔晒。
【中華飯店 聖龍】
地址：新潟縣新潟市中央區東大通1-9-21
營業時間：10:30-15:00、17:00-1:00
定休日：逢星期日
交通：從JR新潟站徒歩約約5分鐘
2. 三代目鳥メロ的新潟駅前東大通店
跟住第2間就係居酒屋，叫做「三代目鳥メロ的新潟駅前東大通店」，燒雞串都係我好想食的美食，香港好難搵到一間平靚正的串燒，於是上網見日本YouTuber推介呢間，就決定一試！話說我住的酒店正正位於餐廳街，行過去呢間只需要1分鐘，本身酒店都近車站，所以行過去都只係3分鐘。
講真一個人去居酒屋問題不大，當然最好係揀有吧台位，今次呢間有吧台，但我平日去所以大把位可以坐，呢度幾好係用平板電腦去落單，圖文並茂唔使驚睇唔明！日本去居酒屋有個習慣，就係patpat都未坐暖就諗咗飲咩先，我今次就先叫一杯生啤！跟住第2個係焗你要的送酒小食，然後叫咗一堆串燒同炸串，例如雞腿肉、雞皮、ぼんじり、青椒仔，然後炸芝士、炸鵪鶉蛋、炸煙肉年糕卷，合共2205日圓都算幾平！
本身滿懷期待去食串燒，點知啲雞串唔太夠熱，雞皮都係夠熱夠脆先好食，真係有少少失望！然後ぼんじり其實係我亂叫，後來先知原來係雞patpat，唔怪得之咁有咬口www至於青椒仔就正常地好食，反而炸串夠熱辣辣比較好食，炸芝士就好難會唔好食，而鵪鶉蛋係我的私心美食！跟住煙肉卷住年糕的口感都唔錯！最後總結係地點方便價錢適中，食物就比較中規中舉。
【三代目鳥メロ的新潟駅前東大通店】
地址：新潟縣新潟市中央區東大通1-2-1 第2マルカビル 2F
營業時間：16:00-01:00
交通：從JR新潟站徒歩約2分鐘
3. 鶏らーめん せっぺ
眾所周知馬高斯係拉麵狂，一日三餐拉麵係絕對無問題，接住介紹的拉麵味道都幾獨特就係「鶏らーめん せっぺ」，呢間店主打三款醬油拉麵，分別係山椒、生姜同柚子去配搭醬油，新潟縣凍的日子都幾多，所以山椒同生姜都幾暖身！我就揀咗山椒醬油拉麵，首先湯頭真係好重山椒味，口腔入面係殘留住鹹香同椒辣的味道係好味但比較重口味，需要飲返幾杯水！至於叉燒方面係選用咗雞肉去做，所以肉質比較嫩！然後最驚喜反而係竹筍，筍肉煮到入晒味又好嫩滑，真係幾正！本身店舖空間比較細就只有一個L型的吧枱，不過細有細好，店主同食客的互動可以更多。
【鶏らーめん せっぺ】
地址：新潟縣新潟市中央區弁天2-1-29
營業時間：11:30-14:00、20:00-1:00
定休日：星期日
交通：從JR新潟站徒歩約7分鐘
4. にぎり米 新潟駅前店
新潟縣最出名就係出產越光米，想品嚐美味的越光米，你去旅行又唔會有電飯煲，又唔會重到死搬包米返香港，所以呢間飯糰專門店真係好重要！店名叫「にぎり米 新潟駅前店」，喺新潟車站行過去只需7分鐘，而我住APA酒店就轉個彎已經到步！一大清早最好食飯糰做早餐，由於太好食的關係，我係有兩日的朝早都食，一次係外賣一次係堂食，兩日去到都係要排隊等食。流程都好簡單，入到去先買飯劵，再將食劵交畀店員然後等食。
我第一次外賣的時候試咗兩款，分別係300日圓的特製三文魚，同埋480日圓的三文魚籽，一大啖咬落去就會見到餡料，特製三文魚鹹鹹地好開胃！至於三文魚籽就都幾大粒，食落去會爆汁同埋有魚籽的鮮味！由於太好食結果我又去食早餐，同樣都係食咗兩個，因為三文魚太好食就再食多次，然後試職員推介的260日圓自家製肉味噌，一朝早凍凍地仲叫咗碗150日圓味噌湯，好簡單的配搭但就非常之好味！
【にぎり米 新潟駅前店】
地址：新潟縣新潟市中央區東大通2-8-4
營業時間：8:00-15:00、16:00-19:00
定休日：星期日及公眾假期
交通：從JR新潟站徒歩約7分鐘
5. 百一膳
跟住第五間餐廳就係食牛扒丼，呢個係馬高斯的大推！我上次去新潟縣的時候已經食過一次，真係太好味的關係，所以今次再次去食！就係一間叫「百一膳」的餐廳，餐廳位於魚市場ピアbandai入面，通常去都係食刺身同壽司，而我就偏偏食牛扒丼www咁因為上次都介紹過，我就唔太詳細講，總之牛扒切片加上七八成熟的程度，再配上餐廳特製的燒肉汁，真係好好食！係食晒之後會有種空虛的感覺！
【百一膳】
地址：新潟縣新潟市中央區万代島2
營業時間：10:45-19:00
定休日：星期二
交通：從JR新潟站徒步約20分鐘
6. BAY STANDARD
好喇！食飽飽之後想飲返杯咖啡放空一下，就係百一膳的隔離再隔離，就有一間叫BAY STANDARD，被咖啡香氣引誘入咗店內，咁我始終對咖啡的認識唔太深，所以好隨意叫咗杯今日精選的PREMIUM，多謝盛惠300日圓！
好快手就已經沖好一杯熱辣辣的咖啡，雖然我就唔怕凍，但係飲返杯熱咖啡既提神又好舒服。呢度就吹多少少水喇，其實呢個魚市場好多嘢食，例如去魚市場買刺身，再去戶外大廣場度坐低慢慢食，又或者入去肉市場買便當，超市度買手信同生果又得，當日仲有即叫即燒的海鮮，真係唔愁無嘢食，只需要煩食唔食得曬！
【BAY STANDARD】
地址：新潟縣新潟市中央區万代島2-8
營業時間：10:00-18:30
交通：從JR新潟站徒步約20分鐘
7. ぽんしゅ館
接住都係飲，不過就係飲酒！通常一個地方有好水就有好米，有靚的米同水自然會有靚的酒！新潟縣其中一樣人氣名物就係清酒，所在地係CoCoLo新潟的西館，呢度係有橋連接住新潟車站，所以好容易就會去到。一入去首先係手信店，呢度有好多新潟縣各地的手信，特別係佐渡島本身比較遠，呢度能夠買到當地手信都係好事，然後比較特別仲有清酒面膜！然後行入少少就會見到目的地，呢個「ぽんしゅ館」雲集縣內所有的清酒，等大家可以一個地方試晒！
首先要去收銀換代幣，100日圓就有1個代幣，大部份酒都係用1個代幣就可以，不過都有少量係用2至3個代幣。一開始會收500日圓，就包一個清酒杯同5個代幣，然後牆上的黑板有寫上本月推介，跟住仲有職員推介，清酒自動販買機係一個正方形一款酒，都真係夠晒花多眼亂！於是我就按住黑板的推介去試，程序上都好簡單，每個酒都有寫上酒名、酒藏，仲有味道的簡介。簡介下面有標示需要幾多個代幣，首先就放個杯入去，入完幣就按一下黃色掣好簡單就完成。如果同朋友去小小地小酎一杯，再吹下水咁就一個夜晚！
【ぽんしゅ館】
地址：CoCoLo新潟 西館
營業時間：9:00-21:00
交通：從JR新潟站徒步約3分鐘
8. とんかつ和幸
話說今次旅程都有去shopping，就去咗Aeon新潟南店。雖然叫做AEON，但其實裡面仲有好多店舖進駐，淨係呢度都夠你行足全日！而我行街之前就去咗醫肚先，就去「とんかつ和幸」食炸豬扒，咁呢間店的水準不嬲都維持正常水平，唔會有驚喜但絕對唔會差，當時推出期間限定的紅葉套裝，咁我就試一試佢！首先係大大隻炸蝦，跟住就係一口炸豬扒，然後就有多汁的炸蠔，最後仲有特製6種菇的可樂餅，一咬落去就爆曬餡料出嚟，菇菇就好係秋天的味道！
【とんかつ和幸】
地址：新潟縣新潟市江南區下早通柳田1-1-1
營業時間：11:00-22:00
交通：從JR龜田站轉乘的士約11分鐘
9. マテリアル カフェ
然後就係旅遊最後一日去食的餐廳，由於當日落雨又吹大風，搞到都無心情四圍去，於是就行咗去商場度hea！呢度係叫做「新潟万代BUS CENTER」，上去2樓就會搵到呢間「マテリアル カフェ」！出發前我係有bookmark呢間餐廳，因為好想食呢度的梳乎厘pancake，始終係平日就唔算多人，小貓幾隻入面只有我呢位男士，見到佢哋望我喺度享受美味的甜食！我呢份朱古力香蕉口味就1070日圓，pancake真係好鬆軟，再配上朱古力醬或者忌廉去品嚐，真係好正！
【マテリアル カフェ】
地址：新潟縣新潟市中央區万代1-6-1 新潟万代バスセンター 2F
營業時間：11:00-20:00
定休日：12月31日至1月1日
交通：從JR新潟站徒步約11分鐘
10. やきとり酒場 のんじゃえ
最後一個係當日的晚餐，事關之前去的居酒屋無辦法滿足到我，點知有一次返酒店的路上，被我發現呢間居酒屋，叫做「やきとり酒場 のんじゃえ」。上次個間就好有連鎖餐廳的味道，反而呢間就好家庭式經營的小店感覺。
到最後好似食咗三千幾日圓，我就叫咗好多串燒，例牌首先一杯生啤先，然後雞腿肉、雞拼香蔥、雞皮，全部鹽燒同汁燒各一，然後仲有燒雞脾菇同燒青椒，都未夠再食唐揚炸雞，全部都好好味，我好收貨！雞皮真係要夠熱夠脆先正，仲要鹽燒夠曬開胃同飲酒一流！跟住發現呢度有得飲當地的銘酒，於日就叫咗杯鶴齡推出的雪男純米酒，口味上就比較辛口，飲落幾香醇！
【やきとり酒場 のんじゃえ】
地址：新潟縣新潟市中央區東大通2-3-23
營業時間：14:00-23:00
交通：從JR新潟站徒歩約7分鐘
