【新潟仙貝王國】

跑完東京馬拉松之後，上個禮拜就同朋友去咗新潟，因為佢地參加咗新潟半馬，今次我就唔跑啦，食下花生最開心。

因為佢地要準備比賽，頭兩日都留喺新潟市內輕鬆行下，網上無意中搵到「新潟仙貝王國」覺得幾有趣，就去睇下。

由新潟市中心去仙貝王國只需要大約20分鐘車程，就算搭車去附近都有JR站。

入到去除咗有好多唔同款式嘅仙貝可以買，最正係可以體驗DIY手燒特大仙貝。

首先將塊生仙貝喺爐上面烤熟，為免燒燶要不斷翻面，而且個過程都幾熱！燒咗一半之後就係最好玩嘅DIY過程，可以用豉油喺仙貝上面畫自己鍾意嘅圖案，然後再燒嘅時候有豉油嘅位置會特別深色，個圖案都幾出！作為跑L，梗係畫返一個跑L每場比賽嘅目標落去。

新潟仙貝王國
+81 25-259-0161
https://maps.app.goo.gl/XNHnNv1CyPqtasQK7?g_st=ic

講返場半馬，雖然係喺新潟市舉行嘅地區比賽，但係一條幾好跑嘅賽道，而且水準都幾高，香港跑手姚潔貞都曾經喺呢條賽道上奪得女子全場第三。

比賽嘅起點同終點都喺新潟運動場，開始之前仲開放跑道比運動員Warm Up，好方便。衝線喺運動場內，仲可以喺看台幫朋友影到好靚嘅衝線相。

搞到我下次都想落埋場跑。

【清津峽】

比賽之後，就同朋友揸車去湯沢，Book咗間溫泉酒店Relax下。

今次揀呢間「一望千里 中屋」，最正係佢個天台溫泉，浸住露天風呂真係可以「一望千里」，一邊浸一邊望住遠方嘅雪山，真係浸幾耐都得。

湯沢附近最有趣嘅景點，係之前已經去過一次嘅清津峽，今次同朋友再去。欣賞清津峽有特別嘅方式，走入「清津峽溪谷隧道」，又稱為「Tunnel of Light」，由建築師馬岩松設計。隧道全長750米，用光同裝置藝術營造出奇幻嘅空間，途中有3個觀景台可以欣賞清津峽，將現代藝術巧妙結合自然風景。最後一個觀景台係最受歡迎嘅打卡點，透過小水池嘅倒影可以影到好有趣嘅相。

清津峽
+81 25-763-4800
https://maps.app.goo.gl/HFcf8cdU8qey2Lsc8?g_st=ic

 【神樂滑雪場】

今次來新潟除咗睇朋友比賽，其中一個最大目的就係滑雪！

之前有跟朋友來新潟學過一堂Snow Board，但3年冇滑真係完全唔記得哂。

再次嚟到湯沢附近嘅神樂滑雪場（かぐらスキー場），估唔到將近3月尾都仲有咁厚嘅粉雪，咁耐冇滑不停PK都唔會太痛。

我地今次冇報班冇請教練，開頭真係連企起身都有困難，但學滑雪，最緊要就係唔怕PK，我地喺新手雪道一仆一碌慢慢咁落咗幾次山，開始慢慢掌握到，而我啲肌肉記憶都開始返嚟，到最後一轉叫做順利做得返基本動作，冇穿冇爛滑到底。

其實真係幾好玩，搞到我好想下次雪季再返嚟，又入多個坑真係好忙🙈

神樂滑雪場
+81 25-788-9221
https://maps.app.goo.gl/XE4vGHjAfgwUh3Sw6?g_st=ic

Featured by Linus Cheng